حسيت اني عايزة أكتب عن تجربتي في الغنا مع
..
بصراحة الموضوع جه بالصدفة البحتة، كنت عارفة قبلها اني باعرف أغني، بس اللي ماكنتش أعرفه هو اني بجد ممكن أعمل كدة ...
طبعا مش هاحكي عن المعارضات البيتية ولا هاجيييييب سيرة،
لكن أنا برده صممت وقلت مابدهاش،
الواحد بييجي الدنيا وبيمشي كأنه لا جه ولا حتي عاش
..
وعملت بروفة، واديتها لحن ومزيكا،
وكانت أول حفلة مع الفرقة في ساقية نيو جينيريشن،
يوم 7 ديسمبر، كانت الناس مش كتيرة لكن عيونهم كت متاخدة وانا باغني بشكل غريب،
وطقم السيكيوريتي خلاني أصدق بجد اني بقدم حاجة حلوة..
ماقالوش حاجة ، لكن عينيهم سافرت معايا لفوق الشمس،
ورجعنا سوا علي دموع كامنجا محمود ..
وف حفلة 25 ديسمبر، كان معايا أغلي ناس،
دكتور سحر الموجي أمنا الروحية،
واخواتي كلهم مالورشة الثقافية،
وناس تانية كتيير،
بس بعد الحفلة حسييت اني بجد قوية،
حسيت وانا باغني بيني وبينك
بكلمة مارسيل خليفة لما قال
"الموسيقي متل الحياة، تبدأمن الصمت وتنتهي الي الصمت"
أنا شاكرة لربنا انه ساعدني أحس بنعمة اداهاني،
ويسرلي اني أعبر عن نفسي
قدام ناس حسوني، وشاركوني رحلتي لفوق الشمس،
وعاشو معايا لحظة حب،
وسمحو لصوت الحلم يعيش
...
5 comments:
ربنا يباركلك فى صوتك
انا بقى وانتى بتغنى بينى و بينك بحس انى بطير قوى بس لسه فى حاجه خانقانى و رابطانى بالأرض و لازم اعيط
حتى لما بسمعها فى البيت بعيط
ربنا يباركلك فى احساسك
و يسعدك زى مانتى بجد يافطمة بتسعدينا و بتنورى جوانا اماكن منعرفهاش
_______________
على فكرة انا اسمى موجود عندك و كتاباتى
ده كتير اوى
انى المسك انتى
بالنسبه لى حاجه بجد جميله
كل سنه وانتى فى حياتى
فاطمة بنت الحياة
يا مليانة حياة
تصدّقي أنا سمعت عنك قبل ما انت تنوّريني في مدونتي بأربع أيام؟ واللي عرّفني بيكي حد بتحبّيه قوي وبيموت في صوتك، شوقني إني اسمعه يوما ما
والأحلى إنه يحصل بالصدفة إني أتعرّف عليكو انتو التلاتة: انت و نورس وحرّة، في ظرف يومين وتبقو كلكو تلاميذ حبيبتنا سحر الموجي
لسّة كنت بقول لنورا: الدنيا أوضة وصالة، والصالة متأجّرة
بجد نفسي أقابلكو كلكو، أحضن نورا، وأدوّق حرة من الكوكيز، وأسمع صوتك وانت بتغنّي
كل سنة وانت صوتك عالى وشجن
كل سنة وانت مبسوطة وراضية وأقرب لهدفك في الحياة
رغم إني حظي ما كانش ف صفي فماحضرتش الحفلة...
وكمان مش في صفي فمش عارف اسمع الملف على الكمبيوتر رغم إني ستّبت كذا برنامج صوت...
إلاّ إني استمتعت جداً جداً بالكلام الراقي الرائق العذب اللي عيشني في الحالة كلها من أولها لآخرها...
أتمنى ينفكّ النحس قريب واعرف اسمع الأغنية... ادعوا لي.
بس
الرخم
أنا بـس اللي عاوز أقوله إنها كانت مفاجـأة أكثر من راااااااااائـعــة .. يوميها ، و دلوقتي لما عرفت مدونتـك دلوقتي ، و عليه ، أطالبـك بطلب صغنن متواضع ، إننا نسمع أغانيكي الجميلة جدًا ....
طب بجد كنتي راااائـعة ، ماشاء الله لا قوة إلا بالله ... ربنا يبارك لك ف صوتـك ، و تقدري توصلي لكل اللي تتمنيه
....................
عاوز أقول لك كمان إن أغنيـتـك اللي لسـه صداها بيتردد ف ودني .... حسستني بالأمل
ــــــــــــ
و ياريت تنزلي أعمالك هنا !!
ولا إيه :)
Post a Comment